سیالکوٹ سے گریس کشتی حادثے کے مرکزی ملزم کی گرفتاری؛ ایف آئی اے کی بڑی کارروائی

p>

وفاقی تحقیقاتی ادارے نے سیالکوٹ میں کارروائی کر کے گریس کشتی حادثے کے مرکزی ملزم عثمان ججا کو گرفتار کر لیا ہے۔ ایف آئی اے کے گوجرانوالہ سرکل کے مطابق ملزم دسمبر 2024 میں یونان کے ساحل پر ڈوبنے والی کشتی کے حادثے میں کم از کم 40 پاکستانیوں کی ہلاکت کے کیس میں مطلوب تھا اور گرفتاری سے بچنے کے لیے گلگت بلتستان میں روپوش تھا۔

ایف آئی اے کے ترجمان کے مطابق ملزم پر الزام ہے کہ وہ بین الاقوامی انسانی سمگلنگ نیٹ ورک کا اہم رکن تھا اور یورپ جانے کی خواہش مند افراد سے لاکھوں روپے وصول کر کے انہیں خطرناک سمندری سفر پر بھیجتا تھا۔ ملزم گوجرانوالہ کے کمپوزٹ سرکل میں آٹھ سے زائد مقدمات میں مطلوب بتایا جاتا ہے۔ یہ کارروائی وفاقی وزیر داخلہ کی ہدایت پر کی گئی۔

حکام کے مطابق انسانی سمگلروں کے خلاف ملک گیر کریک ڈاؤن جاری ہے اور گرفتار ملزم سے مزید تفتیش کی جا رہی ہے۔ وہ کشتی لیبیا کی بندرگاہ طبرق سے روانہ ہوئی تھی، جس میں 175 غیرقانونی تارکین وطن سوار تھے۔