ون ڈے رینکنگ میں پاکستان کی بڑی پیش رفت: آسٹریلیا کو پیچھے چھوڑ کر چوتھی پوزیشن حاصل کر لی

انٹرنیشنل کرکٹ کونسل کی جاری کردہ نئی ون ڈے رینکنگ میں پاکستان نے آسٹریلیا کو پیچھے چھوڑتے ہوئے چوتھی پوزیشن حاصل کر لی ہے۔ راولپنڈی میں جاری سہ ملکی سیریز میں سری لنکا اور انگلینڈ کے خلاف مسلسل فتوحات کے بعد قومی ٹیم کے ریٹنگ پوائنٹس 103 ہو گئے ہیں۔

تازہ رینکنگ کے مطابق بھارت 115 پوائنٹس کے ساتھ پہلے، نیوزی لینڈ 109 پوائنٹس کے ساتھ دوسرے اور جنوبی افریقا 104 پوائنٹس کے ساتھ تیسرے نمبر پر موجود ہے، جبکہ آسٹریلیا پانچویں پوزیشن پر چلا گیا ہے۔ پاکستان اب جنوبی افریقا سے صرف ایک پوائنٹ پیچھے ہے۔

رینکنگ میں اس بہتری کی بڑی وجہ انگلینڈ کے خلاف 87 رنز کی شاندار فتح بنی، جس میں نوجوان آل راؤنڈر عرفات منہاس نے 58 گیندوں پر 59 رنز بنانے کے بعد صرف 40 رنز دے کر 6 وکٹیں حاصل کیں۔ اس میچ میں پاکستان نے ابتدا میں 81 رنز پر 4 وکٹیں گنوانے کے باوجود حسن نواز کے 79 اور فہیم اشرف کے 39 رنز کی بدولت 302 رنز بنائے، جواب میں انگلینڈ کی ٹیم 215 رنز پر ڈھیر ہو گئی۔ نئی رینکنگ میں ون ڈے اور ٹی 20 کھلاڑیوں کی پوزیشنوں میں بھی تبدیلیاں آئی ہیں، اور فتوحات کا سلسلہ برقرار رہا تو قومی ٹیم مزید اوپر جا سکتی ہے۔