بحر ہند کے جزیرہ نما ملک ماریشس میں پولیس کی فائرنگ سے ایک خاتون کے زخمی ہونے کے بعد پھوٹنے والے پرتشدد مظاہروں پر قابو پانے کے لیے حکومت نے دارالحکومت پورٹ لوئس سمیت کئی علاقوں میں رات کا کرفیو نافذ کر دیا ہے۔
مظاہرے گزشتہ ہفتے پانی کی قلت اور مہنگائی کے خلاف پرامن احتجاج سے شروع ہوئے تھے، لیکن جمعے کو ایک پولیس چوکی پر 27 سالہ خاتون کے گولی لگنے سے زخمی ہونے کے بعد صورتحال پرتشدد ہو گئی۔ مظاہرین نے سڑکیں بلاک کر دیں، ٹائر جلائے اور سرکاری عمارتوں کو نقصان پہنچایا۔
پولیس کے مطابق فائرنگ کرنے والے اہلکار کو گرفتار کر لیا گیا ہے جبکہ تین دیگر اہلکاروں کو معطل کر دیا گیا ہے۔ وزیراعظم نوین رام گولام نے قوم سے خطاب میں خبردار کیا کہ تشدد میں ملوث افراد کو سنگین نتائج کا سامنا کرنا پڑے گا۔ پولیس کا کہنا ہے کہ اب صورتحال قابو میں ہے۔ یہ 1999 کے بعد ملک میں بدترین بدامنی قرار دی جا رہی ہے۔
0 تبصرے