بنگلہ دیش میں گارمنٹس مزدوروں کے تنخواہوں کے مطالبے پر احتجاج تیسرے روز بھی جاری رہا، جس کے باعث تقریباً 690 فیکٹریوں میں پیداوار معطل ہو گئی۔ ان فیکٹریوں میں کام کرنے والے تقریباً 17 لاکھ مزدور متاثر ہوئے ہیں۔
مزدور ماہانہ کم از کم اجرت 30 ہزار ٹکہ (تقریباً 243 ڈالر) مقرر کرنے کا مطالبہ کر رہے ہیں، جبکہ موجودہ کم از کم اجرت ساڑھے 12 ہزار ٹکہ ہے۔ ڈھاکا، غازی پور، ساور اور اشولیا میں مظاہرین نے سڑکیں بلاک کیں اور فیکٹریوں میں توڑ پھوڑ کی، جبکہ پولیس نے مظاہرین کو منتشر کرنے کے لیے آنسو گیس اور واٹر کینن کا استعمال کیا۔
صورتحال کو سنبھالنے کے لیے حکومت نے اتوار کو چھ رکنی ویج بورڈ قائم کیا ہے جو مزدوروں کے مطالبات کا جائزہ لے گا۔ بنگلہ دیش کی گارمنٹس صنعت کی مالیت تقریباً 38 ارب ڈالر ہے اور یہ ملک کی برآمدی آمدنی کا 80 فیصد سے زائد حصہ فراہم کرتی ہے۔
0 تبصرے